Azərbaycan Respublikası Prezidentinin 2026-cı il 27 fevral tarixli 953 nömrəli Sərəncamı ilə təsdiq edilmiş "Azərbaycan Respublikasında rəqəmsal inkişafın sürətləndirilməsinə dair 2026–2028-ci illər üçün Fəaliyyət Planı"nın 8.1.3-cü yarımbəndi ilə dövlət orqanlarında daxili idarəetmə proseslərinin tam rəqəmsallaşdırılması və "kağızsız hökumət"ə keçid ilə bağlı olaraq, Azərbaycan Respublikasının Milli Arxiv İdarəsi tərəfindən müvafiq tədbirlərin icrası davam etdirilir.

Bu məqsədlə İdarənin tabeliyində fəaliyyət göstərən bir sıra dövlət arxiv xidməti təşkilatları, o cümlədən regionlarda fəaliyyət göstərən Dövlət Arxivinin filialları AzStateNet şəbəkəsinə qoşulub, onların Milli Arxiv İdarəsinin Elektron Sənəd Dövriyyəsi Sisteminə (ESDS), ödənişli arxiv xidmətlərinin tətbiqi üçün müvafiq Elektron Sistemə (NAPAY) inteqrasiyası təmin edilib. 

2026-cı ilin ikinci yarısından etibarən isə Dövlət Arxivinin filiallarının ESDS-ə qoşulması məqsədilə İdarənin Arxiv işinin rəqəmsallaşdırılması və innovasiyalar şöbəsinin müdiri Roza Əliyeva, həmin şöbənin məsləhətçiləri Zinyət Vəliyeva, Qulam Məmmədzadə tərəfindən Dövlət Arxivi filiallarının əməkdaşları üçün müvafiq metodiki və praktiki təlimlər keçirilib. 

Cari ilin sonunadək Dövlət Arxivinin bütün filiallarının müvafiq elektron sistemlərə inteqrasiyası başa çatdırılacaqdır.