Finlandiyalı qonaqlar Milli Arxiv İdarəsində olublar

01 Sentyabr 2025 05:20 XƏBƏRLƏR Baxış sayı : 387

Helsinki Universitetinin Aleksanteri İnstitutunun direktoru Mark Kanqaspuro va həmin institutun professoru Dmitri Frolov Milli Arxiv İdarəsində olub, İdarə rəisi Əsgər Rəsulov ilə görüşüblər. Görüşdə "Azərbaycan Respublikasının Milli Arxiv İdarəsi ilə Finlandiyanın Milli Arxivi arasında arxiv işi sahəsində əməkdaşlıq haqqında Saziş”ə uyğun olaraq görülən işlər haqqında qarşılıqlı məmnuniyyət bildirildi.

Görüşdə İdarənin tabeliyində fəaliyyət göstərən dövlət arxiv xidməti təşkilatlarında, xüsusən Dövlət Tarix Arxivində Azərbaycanda yaşamış və fəaliyyət göstərmiş fin mənşəli şəxslərin həyat və fəaliyyətləri haqqında qiymətli arxiv sənədlərinin mövcudluğu və onların qarşılıqlı istifadəsi haqqında həyata keçirilmiş layihələr haqqında fikir mübadiləsi aparıldı.

Daha sonra qonaqlar Dövlət Tarix Arxivinin, Dövlət Kino-Foto Sənədləri Arxivinin, Oxu zalının fəaliyyəti ilə yaxından tanış oldular.