Naxçıvan Dövlət Universitetinin rektoru Elbrus İsayev Naxçıvan Muxtar Respublikası Dövlət Arxiv İdarəsində olub. Ziyarətin əsas məqsədi həm universitet tələbələrinin İdarədə keçdikləri istehsalat təcrübəsi ilə yaxından tanış olmaq, həm də Naxçıvan Muxtar Respublikası Dövlət Arxiv İdarəsi ilə Naxçıvan Dövlət Universiteti arasında əməkdaşlıq əlaqələrini möhkəmləndirmək idi.

Görüş zamanı İdarənin rəisi Mehman Məmmədov Elbrus İsayevə İdarənin fəaliyyəti, xüsusilə arxiv işinin təşkili, sənədlərin komplektləşdirilməsi, qeydiyyatı, istifadəsi, nəşri və rəqəmsallaşdırılması istiqamətində görülən işlər barədə məlumat verdi. Daha sonra qonaqlar İdarənin, o cümlədən Naxçıvan MR Dövlət Arxivinin fəaliyyəti ilə əyani şəkil tanış oldular. Bildirildi ki, hazırda universitetin buraxılış kursunda təhsil alan Tarix fakültəsinin tələbələri İdarədə və arxivdə istehsalat təcrübəsi keçir. Onlar müxtəlif şöbələrdə sənədlərin qəbulu, qeydiyyatı, təsnifatı, saxlanılması, elektronlaşdırılması kimi proseslərlə yaxından tanış olur, arxiv işinin əsas istiqamətləri üzrə praktiki bilik və bacarıqlar əldə edirlər.

Eyni zamanda qeyd olundu ki, məzunlardan biri – Sadiqov Rəfael Ramin oğlu Azərbaycan Respublikası əmək qanunvericiliyinin tələblərinə uyğun olaraq bağlanmış müddətli əmək müqaviləsi əsasında Naxçıvan Muxtar Respublikası Dövlət Arxivində əmək fəaliyyətinə cəlb edilib.

Rektor tələbələrin praktiki biliklərinin artırılması baxımından bu cür əməkdaşlığın əhəmiyyətini xüsusi vurğulayaraq, yaradılan şəraitə görə Naxçıvan Muxtar Respublikası Dövlət Arxiv İdarəsinin rəhbərliyinə və əməkdaşlarına təşəkkürünü bildirdi.

            Sonda qarşılıqlı fikir mübadiləsi aparıldı, gələcək əməkdaşlıq perspektivləri müzakirə edildi.